Каб людзі ведалі

У чытальнай зале ў пяць гадзін вечара сабраліся бібліятэкары, чытачы, вучні старэйшых класаў вілейскіх школ. На прэзентацыі былі буклеты, інфармацыйныя даведнікі, лістоўкі, якія выдавала бібліятэка на працягу мінулага года.Прысутныя атрымалі магчымасць больш даведацца цікавай інфармацыі пра Вілейскі раён, яго жыхароў, помнікі, архітэктурныя пабудовы.

Загадчыца аддзела абслугоўвання і інфармацыі раённай бібліятэкі Людміла Тонкавіч расказала, што работнікі бібліятэкі сабралі пра горад нямала розных матэрыялаў, якія друкаваліся ў газетах і часопісах.– На сарака трох старонках размешчаная інфармацыя пра Вілейскі раён, – кажа Людміла. – Друкавалі нашы бібліёграфы спецыяльныя буклеты, дзе былі прозвішчы знакамітых спартсменаў і акрабатаў Вілейшчыны.Была анатацыя кнігі беларускай пісьменніцы Нікі Ракіцінай. Галоўны бібліёграф Наталля Бранцава расказала, што яны праводзілі прэзентацыю кнігі Надзеі Нядзелькінай.

Бібліятэкай быў выдадзены спецыяльны буклет да 140годдзя з дня нараджэння беларускага паэта і фалькларыста Адама Гурыновіча, дзе змешчаныя звесткі пра яго жыццё і творчасць.

Акрамя таго, па словах Наталлі Бранцавай, бібліёграфы друкавалі інфармацыйныя лісткі. У адным з іх расказвалі, як зберагчы зрок.– Такія вечарыны-прэзентацыі, – сказала Людміла Тонкавіч, – карыстаюцца вялікім попытам. Людзі даведваюцца шмат новага. А вучняў заўсёды цікавіць інфармацыя пра наш горад.

Надзея СТАНКЕВІЧ.