RSSБібліятэка называе лепшых чытачоў
Вілейка, Aўтар: Марына Сліж, 26.01.2010. 17:20
Перарэгістрацыю чытачоў правялі гэтымі днямі супрацоўнікі цэнтральнай дзіцячай бібліятэкі і назвалі прозвішчы самых актыўных сваіх наведнікаў.
Па словах загадчыцы Святланы Тамілінай, больш за ўсё кніжак прачыталі ў мінулым годзе Наташа Кардымон, Даша Смолік, Раман Стомчык, Таня Новікава і Юля Лукша. Усе яны вучацца ў розных школах горада. А прачыталі – дзесьці па 200 выданняў кожны. Гэта розныя кнігі, даведачная літаратура, часопісы.
“У фае нашай бібліятэкі вісіць прыгожы маляўнічы паравозік з вагончыкамі-кішэнькамі, – расказвае Святлана Таміліна. – У тыя кішэнькі мы паклалі картачкі, на якіх напісалі імёны і прозвішчы самых актыўных сваіх чытачоў”.
Прывучаць дзяцей да кнігі работнікі Вілейскай цэнтральнай дзіцячай бібліятэкі пачынаюць з дашкольнага ўзросту. Нядаўна ў сваіх сценах яны прымалі дзяўчынак і хлопчыкаў са старэйшай групы дзіцячага садка №10. Ім паказалі бібліятэку, пазнаёмілі з новымі кніжкамі, часопісамі. А праз колькі дзён да бібліятэкараў павінны завітаць вучні першых класаў гімназіі “Логас”.
Марына СЛІЖ.
Паслаць камэнтар