У Маладзечне – 25 маршрутаў

Як патлумачыў начальнік аддзела пасажырскіх перавозак аўтобуснага парка №4 Аляксандр Кавалёў, маршруты №19 і 20 адкрыліся ў Маладзечне ў 2009 го­дзе.

Па просьбе жыхароў мікрараёна завода парашковай металургіі (ЗПМ), якія хацелі хутка дабірацца да чыгуначнага прыпынку “Фестывальны”, аўтапарк распрацаваў маршрут №19. Таму расклад руху аўтобусаў прывязаны да раскладу электрычак. №20 стварылі, каб з таго ж мікрараёна ЗПМ можна было даехаць да гарадской паліклінікі, не марнуючы часу на чыгуначным пераездзе, а таксама каб звязаць мікрараён №4 з аўтобуснымі маршрутамі, якія ўжо існуюць.

А ўсяго ў горадзе – 25 маршрутаў: 19 нумараваных (ад “адзінкі” да дваццатага, без трынаццатага) і шэсць “літарных” (5а, 6а, 7а, 8а, 10а, 11а). Маршруты з літарай адрозніваюцца ад сваіх “суродзічаў” нязначна: напрыклад, №10а ад вуліцы Крынічнай да Палаца культуры ідзе, як і №10, пасля – як №7.

Маршруты №№1–11, 14т, 17, 19, 20 ходзяць штодзённа. №№ 10а, 11а, 15 – толькі па буднях, №№12, 16, 18 – толькі ў выхадныя.

У Маладзечне, па словах Аляксандра Кавалёва, гадоў 10 таму дзейнічаў і маршрут №13. Але лічба адыграла сваю ролю ў яго лёсе – ён праіснаваў вельмі непрацяглы час, не прыжыўся, і з таго часу лічбу 13 не выкарыстоўвалі для нумарацыі.

Розныя накірункі па-рознаму і запатрабаваныя ў гараджан. Звычайна вельмі шмат людзей у №№5, 6, 10, мала народу – у №1, 3, 17, 19. Таму і на маршруты вы­хо­дзяць аўтобусы розных памераў: на №17 – маленькі “Радзіміч”, на №10 бывае і “МАЗ” павялічанай умяшчальнасці, з “гармонікам”.

Святлана ЦІШКО.

Экспрэс-апытанне

на тэму транспарту чытайце тут.