У “Маладзіку” спяваюць сябры

Але ніводнай песні Высоцкага за ўвесь вечар не прагучала. Як адзначылі  арганізатары сустрэчы, педагогі цэнтра Сяргей Шыман і Валеры Трацяк, вельмі цяжка добра спяваць песні такога маэстра, а выконваць дрэнна не хочацца. Мерапрыемства мела іншую мэту: знайсці сярод моладзі новыя таленты, тых, хто сам піша песні. Праводзілася гэтае музычнае свята не ў першы раз. Але сёлета крыху змяніла фармат – адсутнічала конкурсная частка.

Адкрывалі канцэрт маладыя таленты, выхаванцы клуба аўтарскай песні “Свечка” цэнтра “Маладзік”. Іван Завалка і Юлія Загузіна на ўкраінскай мове выканалі кампазіцыю пра каханне. У выкананні квартэта – Юліі Загузінай, Івана Завалкі, Юліі Асіповіч і Анастасіі Шыман – прагучала песня “Аксамітны летні вечар”, якая  ў мінулым годзе прынесла яе выканаўцам перамогу на раённых і абласных конкурсах.

Не толькі гітара гучала ў гэты вечар. Струнны ансамбль музычнага вучылішча імя Агінскага выканаў некалькі кампазіцый на скрыпках. Вельмі ўразіла прысутных выступленне вучаніцы гімназіі №10 Лізаветы Бажко, якая спела сваю песню “Мне б стаць воблакам”. Хлопцы з гімназіі №7 прадставілі слухачам песню Сяргея Каплана, які, на жаль, зусім нядаўна  пайшоў з жыцця.

Нотку духоўнасці прыўнёс сваёй “Малітвай” знакаміты бард Лявон Тышкевіч. Па жаданні публікі ён выканаў яшчэ некалькі сваіх твораў. Гледачы запісвалі на дыктафоны песні, здымалі на відэакамеры, каб панесці з сабой часцінку гэтага цудоўнага вечара. Таму можна адзначыць, што цікавасць да гэтага віду мастацтва не слабее. Сапраўды ёсць людзі, якія любяць бардаўскую музыку настолькі моцна, што гатовыя прысвяціць ёй жыццё.

Незалежна ад ўзросту і сацыяльнага становішча. Тут няма абмежаванняў і забабонаў. Скончыўся вечар выступленнем групы “Джаз Квадрат”. Музыканты працуюць у стылі джаз­панк. Падчас выступлення не было ніводнага слухача, які б абыякава паставіўся да іх музыкі – своеасаблівай і таму такой  прывабнай.

Таццяна БАЖКО, моладзевая рэдакцыя “РГ” “Форум”.

Фота Таццяны БАЖКО.