Прэм’еры новага года

Ён тутэйшы, маладзечанскі. Скончыў Беларускую дзяржаўную акадэмію музыкі, два гады выкладаў у Маладзечанскім музычным вучылішчы імя Міхала Клеафаса Агінскага. Затым быў дырэктарам Маладзечанскай дзіцячай школы духавых інструментаў. У 2009 годзе скончыў Беларускую дзяржаўную сельскагаспадарчую акадэмію, дзе займаўся на факультэце вышэйшай школы аграбізнэсу па спецыяльнасці эканоміка і кіраванне, што вельмі спатрэбіцца яму на новай пасадзе.

Прэм’ера сцэнічная адбудзецца 12 лютага. Абласны драматычны тэатр ужо не першы год падтрымлівае творчыя сувязі з Гомельскім гарадскім моладзевым тэатрам. Гэтыя сувязі традыцыйна складаліся з абменных гастроляў, а ў 2008 годзе гамяльчане запрасілі маладзечанцаў удзельнічаць у X Міжнародным фэсце тэатральнага мастацтва “Славянскія тэатральныя сустрэчы”. І не выпадкова, што свой спектакль “Не судзімы будзеце…” па п’есе Януша Главацкага маладзечанцы прадставілі менавіта на фестывальнай сцэне Гомельскага гарадскога моладзевага тэатра.

Тады ж паўстала ідэя “абмену рэжысурай”, якая зараз паспяхова ўвасабляецца ў жыццё. Мастацкі кіраўнік Мінскага абласнога драматычнага тэатра Юры Вута ажыццявіў з трупай Гомельскага гарадскога моладзевага тэатра пастаноўку вядомай камедыі Фрэнсіса Вэбера “Вячэра з дурнем”. А ў чэрвені мінулага года ўжо маладзечанцы атрымалі “зваротны” творчы падарунак: дырэктар­мастацкі кіраўнік Гомельскага гарадскога моладзевага тэатра, заслужаны артыст Рэспублікі Беларусь Віктар Чэпелеў паставіў на маладзечанскай сцэне камедыю Сомерсета Моэма “Верная жонка”.

І вось новая старонка ў плённым супрацоўніцтве двух тэатраў. У лютаўскай афішы маладзечанцаў – прэм’ера іскрамётнай камедыі Рэя Куні “№13”, якую на сцэне абласнога драмтэатра зноў ставіць заслужаны артыст Рэспублікі Беларусь, кіраўнік Гомельскага моладзевага тэатра Віктар Чэпелеў, а мастацкі кіраўнік Мінскага абласнога драматычнага Юры Вута ў хуткім часе накіроўваецца ў Гомель, для пастаноўкі спектакля на сцэне гарадскога моладзевага тэатра. Што тычыцца непасрэдна маладзечанцаў, то ў лютаўскай афішы МАДТа для іх падрыхтавана многа цікавага. Акрамя прэм’ернага спектакля “№13”, іх чакае шэраг камедыйных пастановак: “Верная жонка”, “Камедыя”; да таго ж драматычны тэатр імя Івана Мележа з горада Мазыра пакажа камедыю “Каханне ў стылі барока” . А да Дня закаханых тэатр падрыхтаваў шыкоўны канцэрт, у якім спяваюць драматычныя артысты “Опять метель…”.

Аляксандр ПЫЦЬКО.